حبیب یزدانی
دئیرلر بیر عده جدیدن جدیدآ
کی وضع چوخ خراب دیر شدیدن شدیدآ
و بیچاره یوخسول قیریلدی فشاردان
جیریلدی جهازی دریدن دریدا
بو حالدا جنابلار کی توخدور وئری لر
یالان نان دوغوردان وعیدن وعیدآ
دییورلر کی قیشدی، دوزون یاز کی گلدی
سیزه تازه سبزه خریدن خریدا
یانی بانکلار تک، اتوز تبصریلن
قانین خلقین هرگون، مکیدن مکیدا
هاوا پَسدی دییلر، خزان اسدی دییلر
یاشیل یارپاغ اولموش، شهیدن شهیدآ
دییورلر تاپیلمیر بازاردا دوز انسان
کی شیطانه اولموش مریدن مریدا
یالان دوغورودان باش، وورور هامی چاشباش
اولوب کهنه یولداش پلیدن پلیدآ
قارین آج کی اولدو، دینین رنگی سولدی
شرافتن ایمان، پریدن پریدآ
دَنین پولو دارتی، طلاق هر گون آرتی
اولور تازه ایشلر پدیدن پدیدآ
بوخلقه نه گلدی، کی آلچاخ دیکلدی
دونوب مومن اولدو، یزیدن یزیدآ
قوتور گویچک اولموش، یالان گرچگ اولموش
قارا قویدو آدین، سفیدن سفیدا
حالا دوز دییورلر یا میرت ائیلیورلر
سیزه قوی وئریم بیر نویدن نویدا
چاخان دیر بو سوزلر، ائشیت سون اینانما
نباشد چو دیدن شنیدن شنیدآ
شه هر چوخ گوزلدیر بو ماه روزگاره
یالانان سپیلر اسیداً اسیدآ
اگر دوز ده اولسا آماندی دانیشما
کی ممنوع اولوبدور اکیدن اکیدآ
